الثورة تموت أكلينيكى صح النوم يا صديقى بقلم د- وليد الباز

الثورة تموت أكلينيكى
صح النوم يا صديقى

أرجو ألا أصيبكم بالاحباط فقد تجرعناه سابقا و لا نريد اعادة الكرة مطلقا لقد شربنا هوانا و هضمنا ظلما لا نريد عودته
يكفى وأننا مازلنا شبابا كنا نحمل أثقالا و هما أضعاف أعمارنا
يكفى ثقافة الاحباط و الهزيمة و الخوف على لقمة العيش و المستقبل ميراثا كان يفرضه علينا الآباء بالمشى جنب الحيطة و جوه الحيطة و تحت الحيطة حتى أنهم كانوا يشعروننا أننا مصاصى دماء يجب ألا نظهر فى النور حتى لا تحرقنا أشعة الشمس
و مصاص الدم الحقيقى دراكولا الأصلى يرتع هو و عصاباته بكل حرية يمتصون دماءنا حتى آخر قطرة و لا يتركونا لنتحول مثلهم لمصاصى دماء بل يلقوننا فى غيابات القبور شبه أحياء و فى قيعان البحار بلا شفقة أو دمعة حتى مفتعلة
يكفى أن الأمل كان مفقودا ضائعا ليخرج من فى ريعان الشباب ليقل لى لما تجتهد و متنجحش يبقى أنت أكيد فى مصر لما تتخرج ومتشتغلش يبقى أنت أكيد فى مصر لما تشتغل و متكسبش يبقى أنت أكيد فى مصر لما تحب و متتجوزش يبقى أنت أكيد فى مصر متناقضات جعلت أجيالا تكفر بالنعمة و ترى مصر أم النكد مش أم الدنيا
سامحونى على الوصلة النكد اللى قلتها دى بس عاوزين نفوق و نبطل نفتكر أن مصر هتتغير بالأحلام و الأمنيات و الأناشيد
نبطل نفتكر أن فى لحظة نقلب الصفحة و يبدأ العهد الجديد عهد النعمة و يتنسى بقلبة الصفحة العهد القديم عهد النقمة
ونبطل نفتكر أنه بضغطة زر الريموت هنسيب قناة الطواغيت و نقلب على قناة الحواديت كده توماتيكى توماتيكى
لا يا صديقى تفتكر أن خلاص مفيش واسطة و محسوبية و رشاوى و دكتور الجامعة هيتقى الله و ابنه مش لازم يبقى معيد،والمدرس هيبطل يضغط على الأولاد عشان ياخدوا دروس و التعليم يربى أجيال و يفجر طاقات و اللى يتعلم يشتغل،والطبيب هيبطل يزوغ من شغله،والممرضة تراعى ربنا فى التعقيم،والموظف يبطل يعطل مصالح الناس و يطلب رشوة
والمحليات تبطل فساد،و اللى فوق يبطل يظلم اللى تحت،وامام المسجد يبقى قدوة ويبطل يقول غير اللى بيعمله و يعمل غير اللى بيقوله،و الجيران يبطلوا يعملوا مشاكل مع جيرانهم،وبتوع الزبالة يبطلوا يتأخروا عن مواعيدهم،ومحترفى الشحاتة يبقوا عناصر منتجة،والاعلام يبطل نفاق و هراء، و المنتجين يبطلوا اسفاف الجمهور مش عاوز كده يا نصابين،والممثلات و المغنيات يبطلوا يقلعوا فى هدومهم،والاعلانات تبطل نصب،و المفتى يبطل تخريف،و لاعيبة الكورة يبطلوا استهبال،و التجار يبطلوا جشع،و البنوك تبطل تسلف رجال الأعمال اللصوص،و المواصلات تبقى كويسة و الطرق تبقى آدمية و المية تبقى نظيفة و شركة المية تبطل جشع و الكهربا متقطعش و التليفونات متخربش بيتنا و الزراعة تبطل مبيدات مسرطنة وشركات الأدوية تبطل تستغلنا والضرايب تبطل تمص دمنا،ومراتباتنا تكفينا و نحوش منها،وشوارعنا تبقى أمان، و سواقين التكتك يبقى معاهم رخصة و التكتك له نمرة،والمحاكم تبقى حبالها قصيرة، و اللى ليه حق ميضعش، و الشوارع تبقى نظيفة، و الهواء صحى، و الأسعار فى متناول الجميع، و المصرى يبقى له كرامة، و نبطل نستورد قمح وناكل من فأسنا و ناخد قرارنا من رأسنا و منسبش حد يستغلنا، و نحاسب كل مخطىء، ونكافىء كل مجتهد، ونحترم كل محترم ، وننسف كل بلطجى، وفلوسنا اللى اتنهبت ترجع، والخصخصة للشركات الناجحة تتلغى ، و القطاع العام يرجع،والعدالة الاجتماعية تتحقق
باختصار كده تبقى الدنيا بمبى و الجو ربيع
كلنا حلمنا لكن الواقع لم يتغير بعد
و عارف و كلكم عارفين أن الناس لازم تتغير فعلا و قولا و سلوكا
بس فى مشكلة كبيرة أرجو أن ننتبه لها
و بعيد عن نغمة الأخوان و فلول الحزن الوثنى الغير وطنى الديناصورى الغير ديمقراطى والمسيحيين و المتربصين و المتربصات الأحياء منهم و الأموات
كلامى لكل المصريين لا الأخوان و لا السلفيين و لا الشمال و لا اليمين بكلم الناس العاديين كتلة الصامتين
البطء اللى فيه البلد الآن و عدم محاسبة و اقالة كثير من أصابع الأخطبوط السابق و القيادات الاعلامية و الصحفية و رؤساء الجامعات و عمداء الكليات والمحافظين و رؤساء المدن و الأحياء والمحليات وووووووو والسماح لهم بتدمير الوثائق و أخفاء الأدلة تحت سمع و بصر الجيش
و معلش لو قلت هو الجيش مكنش فاسد؟؟؟؟؟؟؟؟؟؟؟؟؟؟؟؟؟؟؟؟
طبعا لا أنكر الموقف الرائع من الجيش بعدم مهاجمة الثورة
ولكن يا جماعة
عمو طنطاوى صنيعة جدو مبارك
الجيش مؤسسة فاسدة أيضا و من ينكر كلامى لا يريد مواجهة الحقيقة
و لكنى كنت أقول سيأتى دور الجيش ليتم تطهيره و أصلاحه فيما بعد
ولكن
البطء و عدم ملاحقة أصابع الأخطبوط و تدمير المستندات و الأدلة و اشعال الفتن و المؤامرات أشتم منه محاولات خنق الثورة و المحاولات بدأت تنجح و الثورة الآن فى العناية المركزة و على وشك الموت الأكلينكى
نصحى بقى و نفوق أعداء الثورة السابقين يتكلمون الآن بأسمها أحدهم كان يستهزأ بجمعة الغضب و جمعة الصمود و يقول لى الجمعة اللى جاية اسمها نادية
و لما جاء البلطجية تحت بصر الجيش بالخيول و الجمال قال لما لم يأتوا بالكلاب ؟
أين محاسبة البلطجية؟ أين التحقيقات فى دماء الشهداء؟ ما أسماء المتورطين؟ ما الاجراءات التى تمت معهم؟ ما العقاب لمن زوروا تقارير الطب الشرعى و كتبوا فى تقاير الوفاة اختناق بدل من كتابة الحقيقة اصابات بالرصاص الحى؟ما العقاب لقائدى السيارات المصفحة التى دهست الناس؟ أين التحقيقات؟ما مصير البلاغات عن ثروة مبارك و أسرته؟ لما المدعى العام لم يستدعيه للتحقيق؟
كيف و بأى منطق تم اعادة تصدير الغاز لاسرائيل بنفس السعر السابق لحين مراجعة الأسعار؟
كيف و بأى منطق أعداء الثورة الآن يطبلون فى الأعلام و يقدحون فى النظام السابق؟ من المسئول عن استمرار تلك الأرجوزات حتى الآن؟
والكثيرون من الخونة يتمنون فشل الثورة تفشيا وأملا ألا تطلهم يد العقاب
و لا أريد فتح ملف الجيش على مصراعيه الآن و لكن أريد أن تنتبهوا معى و نصحصح بعضنا
المستفيدون من النظام السابق أعدادهم لم تكن قليلة
والحرب معهم لن تكون قصيرة التفاؤل لوحده مش كفاية و اللى حصل مش النهاية دى بس البداية
حد يفهمنى أيه حكاية قانون تجريم الاضرابات اللى الحكومة بتطلعه الوقت ؟؟؟؟؟؟؟
هى دى بداية قصيدة الحرية يا سادة بداية القصيدة كفر
لا لخنق الحريات مهما كانت المبررات
الا لو كانت الثورة ماتت و هنشربها عليها فى المأتم سادة
اللهم قد بلغت اللهم فاشهد
بقلم د- وليد الباز